Hinihinalang aabot sa P7 bilyon ang halagang nakulimbat ng sinibak na alkalde ng Bamban, Tarlac na si Alice Guo at kanyang mga kasamahan sa illegal Philippine offshore gaming operations (POGO) sa bansa na naging basehan ng paghahain ng reklamong money laundering laban sa kanila sa Department of Justice (DOJ) ngayong Biyernes, Agosto 30.
“We have included Alice Guo. Based on our findings, she is the principal in the money laundering committed in this case. She used several entities in transferring her money. It went to an entity,” sabi ni Anti-Money Laundering Council (AMLC) Deputy Director Adrian Arpon.
Sinabi ni Arpon na 87 counts of money laundering ang inihaing reklamo laban kay Guo at 35 iba pa na may kaugnayan sa sinalakay na POGO hubs sa Bamban, Tarlac at Porac, Pampanga.
Bitbit ng mga kinatawan ng AMLC, National Bureau of Investigation (NBI) at Presidential Anti-Organized Crime Commission (PAOCC) nang magtungo sa DOJ dakong alas-2:30 ng hapon ang 10 kahon na naglalaman ng mga dokumento na diumano’y magdidiin kay Guo at kanyang mga kasamahan sa money laundering complaint.
Kabilang sa mga respondents sa reklamo ay sina Alice Guo; Shiela Guo, na diumano’y kapatid ng dating alkalde; Cassandra Li Ong, sinasabing kinatawan ng Porac POGO hub; at former Technology and Livelihood Resource Center (TLRC) deputy director general Dennis Cunanan, at iba pa.