Mariing pinaalalahanan ni DOTr Secretary Banoy Lopez ang mga driver ng pampublikong sasakyan na tigilan ang pangingikil at pananamantala sa mga pasahero, lokal na residente man o banyagang turista, sa gitna ng patuloy na pagtaas ng presyo ng langis.

Sa isang post sa social media, ibinahagi ang naging karanasan ng ilang turistang Taiwanese kung saan ang siningil umano sa kanila ng driver ay umabot sa P9,600 sa halip na P500 pesos lamang mula sa Ninoy Aquino International Airport (NAIA) patungo sa kanilang destinasyon sa Maynila.

Ipinag-utos na ni Lopez sa Land Transportation Franchising and Regulatory Board (LTFRB) at Land Transportation Office (LTO) na paghuhulihin ang sino mang drayber na mahuhuling nanloloko’t nananamantala sa mga pasahero.

Maaari ding suspendihin o kanselahin ang prangkisa ng mga transport operators. Dagdag ding kautusan ni Lopez sa LTFRB, sampahan ng kasong kriminal ang mga mahuhuling nananamantala.