Ibinaba na ng Philippine Institute of Volcanology and Seismology (PHIVOLCS) sa Alert Level 0 o sa normal ang bulkang Bulusan sa Sorsogon gabi nitong Biyernes, Pebrero 6.
“Bulusan Volcano has returned to relative quiescence following a general decline in monitoring parameters,” ayon sa ulat ng PHIVOLCS.
Ayon sa ahensya, bumaba na sa baseline levels na zero hanggang lima ang bilang ng volcanic earthquakes ng bulkan na may “shallow depth of less than six kilometers beneath the southeastern edifice.”
Nag-deflate na rin umano ang general southern at eastern sectors ng bulkan mula noong ikatlong linggo ng Nobyembre 2025 at Oktubre 2025 na nagpapahiwatig ng “depressurization of the volcanic system.”
Dahil dito, ibinaba na ang alert level nito mula sa Alert Level 1.
“This means observational parameters have returned to baseline or background levels and no magmatic eruption is foreseen in the immediate future,” dagdag pa ng PHIVOLCS.
Sa kabila naman nito ay ipinagbabawal pa rin ang pagpasok sa four-kilometer radius permanent danger zone, partikular sa mga vent sa south-southern slopes nito, dahil posible pa rin umanong magkaroon ng biglaan at hazardous na phreatic eruption sa bulkan.
Ulat ni Ansherina Baes