Sa panayam sa kanya sa podcast ‘Basta Dabawenyo’ kamakailan, diretsahang hinamon ni acting Davao City Mayor Sebastian ‘Baste’ Duterte nang suntukan si Philippine National Police (PNP) chief Gen. Nicolas Torre III dahil sa diumano’y patung-patong na atraso nito sa pamilya Duterte.
“Kasi matapang ka lang naman if you have the position. Pero kung suntukan tayo, alam ko kaya kita. Kung gusto mo akong harapin, harapin mo lang ako,” hamon ni Duterte.
“Do not worry Mr. Torre, sanay na ako sa iyo. You are nothing without your position…sa totoo lang,” inihayag ni Baste, na naglabas ng galit sa hepe ng Pambansang Pulisya sa diumano’y nangyaring “kidnapping” sa kanyang ama na si dating Pangulong Rodrigo Roa Duterte.
Minaliit din ni Baste ang ibinabandera ni Torre na quick emergency response time ng PNP na ayon sa alkalde, ay isang paraan lamang upang takutin ang mga residente ng Davao City.
“Sinabi naman ni Torre na may 3-minute (sic) response siya. Sana ma-feel ng mga Dabawenyo,” ani Baste.
Tinawag din ni Baste si Torre na “ambisyoso” na may balak tumakbo sa posisyon sa May 2028 elections. “Iba yung ambisyon mo sa buhay. I don’t feel that you’re here to serve and protect people,” giit ng alkalde.