Inihayag ni dating Supreme Court Associate Justice Antonio Carpio na bagaman may batas na nagpoprotekta sa confidentiality ng mga bank deposit, o ang “Bank Secrecy Law,” ay mayroon din itong mga “exceptions” na nangangahulugang hindi na ito sakop ng batas, na ayon kay Carpio ay: “in case of impeachment, at pangalawa if there is a written consent from the depositor.”
“Under the Bank Secrecy Law natin, bank deposits are absolutely confidential pero may mga exceptions— dalawa na applicable dito; one in case of impeachment,” sabi ni Carpio.
Ito ay kaugnay sa posibilidad na maghain umano ang House prosecution panel ng ‘subpoena deuces tecum’ sa bank records ni Vice President Sara Duterte ngunit pagbobotohan pa umano ito ng mga Senator-judge.
“The Senator-judges by majority vote can say no or can say yes. ‘Pag ‘no’ iyan, well they will have to contend with the reaction of the public. Katulad ng second envelope ‘yan, during the impeachment of former president Estrada,” dagdag ni Carpio sa isang panayam sa DZMM Teleradyo ngayong Miyerkules, Hulyo 2.
Una nang nabanggit ni Carpio na nasa bank records ang susi para mapatunayan umano kung totoo o hindi ang mga paratang laban kay VP Sara hinggil sa kuwestiyunableng paggastos niya ng confidential at intelligence funds.
“The issue there, pinaka-importante, ‘yung pag-subpoena ng bank records. ‘Yun ang pinaka-importante, doon maglalabanan,” aniya sa panayam sa Super Radyo DZBB noong Hunyo 22.
Ulat ni Jilliane Libunao