Sinabi ni dating senador Sonny Trillanes na dapat seryosohin ng kampo ni President Ferdinand Marcos Jr. ang mga paghamon dito na magbitiw sa puwesto, gayundin ang mga pagtitipon na tinatawag na prayer rally, na inoorganisa ng kampo ng pamilya ni dating pangulong Rodrigo Duterte.
“Mga Dutertes ‘yan, all options on the table ‘yan. Walang moral barriers or obstacles to stop them from achieving their goal of installing Sara Duterte as President… Whether impeachment man ‘yan, withdrawal of support, people power, assassination even. Kumbaga lahat ng puwedeng gawin, gagawin ng mga Dutertes… walang moral compass itong mga ito,” ani Trillanes.
“’Yung position dapat nung nasa administrasyon, lahat ng impormasyon, lahat ng mga ganyan, ay seseryosohin,” sinabi ni Trillanes sa panayam sa kanya sa ‘Facts First’ vlog ni Christian Esguerra nitong Marso 14.
“Kailangan vigilant sila, imino-monitor nila lahat ‘yan, ano ‘yung sinabi, saan galing, sino nag-mobilize? ‘Yung pera, sino nag-release? Ano ‘yung bigger plan, rally lang ba ‘yan? Sino ‘yung speakers? Ipa-process nila ‘yung buong communication plan,” mungkahi ni Trillanes.
‘’Yung AFP (Armed Forces of the Philippines), dapat constant ‘yung pagtse-check kung may nanloloob, may mga nag-a-attempt mag-recruit, kasi hindi puwedeng magkumpiyansa dahil Vice President si Sara, any false move may lead to an ouster,” paliwanag pa ni Trillanes.