Para kay former senator Antonio ‘Sonny’ Trillanes IV, hindi dapat baguhin ang 16 na botong kailangan para ma-convict ng Senate impeachment court si Vice President Sara Duterte.
“’Yung mga nawala naman [na senador] ay mga inclined to acquit, so, hindi sila nakabawas sa chances of a conviction. Ang bilang ko, [posibleng] maximum dito ay 17 conviction votes,” opinyon ni Trillanes.
Sa interview sa kanya sa ‘Facts First’ ni Christian Esguerra, sinabi ni Trillanes na parehong “inclined to acquit” naman sina Senators Ronald ‘Bato’ dela Rosa at Jinggoy Estrada, na kapwa kaalyado ni VP Sara.
Si Dela Rosa ay nagtatago kaugnay ng arrest warrant nito mula sa International Criminal Court (ICC), habang nakakulong naman si Estrada dahil sa plunder sa pagkakaugnay umano sa flood control projects scandal.
“Kung meron man permanently na wala sa Senado, gaya ni Bato at Jinggoy, I still believe 16 ‘yung kailangan na conviction votes,” sabi ni Trillanes.
Sa Hulyo 6 magsisimula ang impeachment trial ni VP Sara sa Senado.