Kinumpirma ng Anti-Money Laundering Council (AMLC) na maraming beses na-flag ang mga bank accounts nina Vice President Sara Duterte at asawa niyang si Atty. Manases “Mans” Carpio dahil sa hinalang sangkot ang mga ito sa drvg trafficking, corruption, at misuse of public funds.
Sa pagtestigo ni AMLC Executive Director Ronel Buenaventura sa House impeachment hearing nitong Miyerkules, Abril 22, sinabi niyang naging paksa ng 17 confidential reports si Vice President Sara Duterte na isinumite ng ilang covered persons mula Agosto 2, 2024, hanggang Enero 29, 2026, para sa “suspected activities involving drug trafficking and related offenses, graft and corrupt practices, and malversation of public funds and property.”
Ayon kay Buenaventura, ang suspisyon sa drvg trafficking at iba pang related offenses ay bunsod ng mga “news reports alleging the involvement of VP Sara’s husband in the Php6.4 billion shabv importation in 2017.”
Samantala, ang hinala sa graft and corrupt practices at malversation of public funds ay batay naman sa mga “news articles related to the impeachment case filed against VP Sara in 2025, as well as alleged misuse of confidential/intelligence funds.”
Muli umanong naging paksa si VP Sara sa parehong mga suspisyon matapos magpasa ng karagdagang 17 confidential report ang ilang covered persons mula Setyembre 4, 2017, hanggang Abril 25, 2025.
Sa ilalim ng batas, ang mga bangko at covered persons ay obligadong mag-ulat ng mga kahina-hinala at malalaking transaksyon sa AMLC, na siya namang magtitipon at mag-aanalisa ng datos para sa potensyal na money laundering at iba pang kaugnay na krimen.
Ulat ni Bea Tanierla