Inanunsiyo ng Global Ferronickel Holdings Inc. na boluntaryong nag-file ng leave ang kanilang chairman na si Joseph Sy, na naaresto ng Immigration authorities noong Agosto 21, na kasalukuyang iniimbestigahan ng Senado dahil sa mga pekeng dokumento na nagsasabing siya ay isang “Filipino citizen.”
“This decision reflects the Board’s commitment to allowing Mr. Sy to focus on resolving his personal legal matters while safeguarding the best interests of the Company and its stakeholders,” pahayag ng Global Ferronickel Holdings Inc.
Noong Miyerkules, Agosto 27, inihain ni Sen. Risa Hontiveros ang Senate Resolution No. 93 na humihiling sa malalimang imbestigasyon sa kung paano nakakuha si Sy, na diumano’y may Chinese name na “Chen Zhen Zhong,” ng mga dokumento tulad ng Philippine passport upang palabasin na siya ay isang Filipino citizen.
Ngunit sa ginanap na Senate hearing, ipinakita ni Hontiveros ang ilang dokumento, tulad ng isang affidavit for late registration of birth na may petsang Disyembre 28, 2007, na isinumite ni Sy matapos ang 11 taon ng kanyang araw ng kapanganakan noong Oktubre 10, 1996.
Ipinakita rin ni Hontiveros ang fingerprints ni Sy sa Alien Certificate of Registration identity card na tumugma sa fingerprints na nakalagay sa kanyang Philippine passport.
Bukod dito, nakuha rin diumano ni Sy na makapasok sa Philippine Coast Guard Auxiliary (PCGA) at nabigyan pa ng ranggong “commodore” o katumbas ng one-star rank general gamit ang pekeng Philippine passport at iba pang dokumento.
“These measures underscore commitment to stability, transparency, and strong corporate governance, providing clear leadership structure and reinforcing independent oversight while the Company continues to execute its business strategy,” dagdag ng Global Ferronickel.
Pansamantalang hahawakan ni Jaime del Rosario, lead independent director ng Global Ferronickel, ang binakanteng posisyon ni Sy, ayon pa sa kumpanya.