Ipinaliwanag ni Sen. Risa Hontiveros sa ‘Kapihan sa Senado’ ngayong Huwebes, Agosto 28, na ang ehekutibo ang magdedesisyon kung ia-approve o disapprove nila ang extradition request ng United States kay Kingdom of Jesus Christ (KOJC) founder Apollo Quiboloy.
“‘Yung pag-approve o disapprove ng request, nandu’n ‘yun sa executive…sinabi noon ng DOJ puwedeng tapusin muna ang mga proseso dito sa Pilipinas…or sabi ng DOJ noon puwede ring i-suspend muna ‘yung mga proseso dito at ipaharap muna siya through extradition du’n sa mga proseso sa US,” saad ni Hontiveros.
“Sinabi noon ng DOJ (Department of Justice) puwedeng tapusin muna ang mga proseso dito sa Pilipinas bago, kung bibigyang-daan nila ang request ng US government, i-extradite siya sa US or sabi ng DOJ noon puwede ring i-suspend muna ‘yung mga proseso dito at ipaharap muna siya through extradition du’n sa mga proseso sa US,” aniya.
“Welcome” naman umano para kay Hontiveros ang ‘positive development’ sakaling magdesisyon ang ehekutibo na paharapin si Quiboloy sa kaso nito sa US bago harapin ang kaso sa Pilipinas.
“Dalawang goods ang mangyayari: maitataguyod pa rin natin ang proseso dito sa ating bansa at mapapaharap din si Apollo Quiboloy sa kanyang mga biniktima du’n sa United States. Mabibigyan din sila ng pagkakataong magkaroon ng hustisya tulad ng sinimulan natin dito sa Pilipinas,” saad ng senador.
Ayon sa website ng Federal Bureau of Investigation (FBI), nahaharap ang pastor, na kasalukuyang nakakulong sa Pasig City Jail, sa kasong Conspiracy to Engage in S3x Traffcking by Force, Fraud and Coercion, and S3x Traffcking of Children; S3x Traff*cking by Force, Fraud, and Coercion; Conspiracy; at Bulk Cash Smuggling.
Ulat ni Ansherina Baes