Pinayagan ng Manila Regional Trial Court (RTC) si Ramil Madriaga na dumalo sa House impeachment proceedings laban kay Vice President Sara Duterte sa darating na Abril 14, ayon kay Bicol Saro Rep. Terry Ridon.
Nakatakdang humarap ang nagpakilalang dating “bagman” umano ni VP Sara na si Ramil Madriaga sa House Committee on Justice sa Abril 14, mula alas-8 ng umaga hanggang alas-5 ng hapon.
“The Jail Warden of MMDJ Annex 2 is directed to make a report within five (5) days from compliance therewith,” mababasa sa kautusan ng Manila Regional Trial Court (RTC) na binasa ni Bicol Saro Rep. Terry Ridon.
Matatandaang ipina-subpoena ng komite si Madriaga dahil sa mga impormasyong hawak nito umano hinggil sa kuwestiyonableng paggamit ng confidential funds ni VP Sara.
Sa kasalukuyan, nananatiling nakapiit si Madriaga sa Bureau of Jail Management and Penology (BJMP) sa Taguig City kaugnay ng kinakaharap nitong kasong kidnap-for-ransom.
Ulat ni Bea Tanierla