Ibinunyag ni Senate President Pro Tempore Panfilo ‘Ping’ Lacson sa panayam sa kanya sa Super Radyo DZBB nitong Martes, Oktubre 28, na mayroong “very important witness” na dadalo sa Blue Ribbon Committee hearing na posibleng ganapin sa Nobyembre 14.
“Nagtataka ako, may nakita akong dokumento nagme-memo kay (ex-DPWH) Secretary (Manuel) Bonoan, nung pina-check ko ‘yung pangalan…‘yun pala broker ng mga contractor,” saad ni Lacson.
“Mas lalawak pa ‘yun at may mga madadagdag na pangalan na medyo malaki…may government official, may civilian pa nga e,” aniya.
Ipinaliwanag ni Lacson na ang witness na ito ay isa umanong broker ng mga contractor na kanilang nahanap dahil sa isang handwritten na post-it memo para kay dating Department of Public Works and Highways (DPWH) Secretary Manuel Bonoan, na nag-eendorso ng mga proyekto.
“Paano siya nagme-memo sa Secretary ng Public Works?…Hindi dumadaan sa official channel ng departamento, parang sumosolo yata si Secretary na merong sariling diskarte, eh departamento niya na ‘yun, bakit kailangang sumideline ka pa sa labas?” saad ng senador.
Ulat ni Ansherina Baes