Idineklara ng Manila Regional Trial Court (RTC) Branch 18 na ang lagda ni Atty. Petchie Rose Espera na nakalagay sa sworn statement ni dating Philippine Marine soldier Orly Guteza na may petsang Setyembre 24, 2025 at isinumite sa Senate Blue Ribbon Committee, ay hindi sa abogado dahil pineke lamang ito.
“Conclusion: The questioned and the standard specimen signatures PETCHIE ROSE G. ESPERA were not written by one and the same person,” nakasaad sa dokumento ng Manila RTC Branch 18.
Sa 11-pahinang dokumento kung saan nakasaad ang resulta ng forensic examination ng National Bureau of Investigation (NBI), sinabi ni Manila RTC Branch 18 Executive Judge Carolina Icasiano-Sison na kinumpirma ng mga imbestigador na ang lagda sa affidavit ni Guteza at ang kanyang actual signature ay hindi rin tumutugma.
“Laboratory comparative examination conducted on the specimens submitted using the stereoscopic microscope, Video Spectral Comparator (VSC4000), forensic image analyzer, magnifying hand lens, and photographic enlargements (comparison chart) reveals the existence of significant fundamental differences in handwriting characteristics and habits between the questioned and the standard specimen signatures PETCHIE ROSE G. ESPERA,” nakasaad sa report ng NBI na isinumite sa korte.
Dahil dito, inirekomenda ni Sison ang paghahain ng kasong falsification laban kay Guteza at iba pang nasa likod ng pagprisinta ng kontrobersiyal na dokumento kung saan nakalagay ang pekeng lagda ni Espera at iba pang kuwestiyunableng impormasyon na nakasaad doon.
Si Guteza ay ang “surprise witness” na ipinakilala ni Sen. Rodante Marcoleta sa pagdinig ng Senate Blue Ribbon Committee noong Setyembre 25, 2025.