Nagpasya ang mga hukom ng ICC Appeals Chamber na i-disqualify si Chief Prosecutor Karim Khan mula sa kaso ni dating Pangulong Rodrigo Duterte sa ICC dahil sa posibleng conflict of interest, ayon sa ulat ng Reuters.
Mababasa sa exclusive story ng Reuters na inilabas nitong Martes, Oktubre 14, na nakita na nila ang kopya ng desisyon ng mga hukom ng Appeals Chamber ng ICC hinggil sa pag-disqualify kay chief prosecutor Karim Khan mula sa kasong crimes against humanity na kinakaharap ni Duterte sa international tribunal.
Matatandaang una nang humiling ang defense team ni Digong sa Appeals Chamber na i-disqualify si Khan mula sa kaso dahil “he failed to disclose a grievous conflict of interest.”
Kinontra naman ito ni Khan na mababasa sa isinumite niyang dokumento na isinapubliko nitong Oktubre 7, kung saan humihiling siya sa Appeals Chamber na i-dismiss ang disqualification bid laban sa kanya.
“The Prosecutor has carefully considered the position, and… does not consider that any conflict of interest arises from his 2018 representation of a group of victims in submitting an Article 15 communication to former Prosecutor H.E. Fatou Bensouda,” giit ng chief prosecutor.
Batay sa ulat ng Reuters, nakakita umano ang mga Appeals Chamber judges ng posibleng “bias” sa chief prosecutor: “Khan might appear to be biased due to his previous role and so was disqualified from the case.”
Sa kasalukuyan, hindi pa naisasapubliko ng ICC ang kopya ng desisyon ng Appeals Chamber hinggil sa pag-disqualify kay Khan.
Ulat ni Jilliane Libunao