Inirekomenda na ng Philippine Army Reserve Command (Rescom) na tanggalin sa kanilang roster si Cavite 4th District Rep. Francisco ‘Kiko’ Barzaga dahil sa panawagan nito sa mga tauhan ng Armed Forces of the Philippines (AFP), Philippine National Police (PNP), at AFP reserve units na makibahagi sa anti-corruption rally noong Setyembre 21 upang batikusin ang gobyernong Marcos.
“His speeches and utterances on social media insinuating that the AFP, PNP, and reservists will join the protest on Sept. 21, 2025, declaring the loss of trust in the President by the AFP and PNP, and the likes, constitute misconduct,” sabi ni Army spokesman Col. Louie Dema-Ala.
Ito ay matapos imbestigahan ng Army Rescom ang mga post sa social media ng kongresista na kasalukuyang may ranggong private matapos siyang ma-enlist sa reserve force noong Enero 10 sa ilalim ng National Capital Region-Community Defense Group.
“He is recommended for delisting after a thorough investigation. The recommendation is forwarded through the proper channel for final action,” sabi ni Dema-Ala.
Aniya, ang naging panawagan ni Barzaga sa mga reservists at active military personnel na batikusin ang gobyerno ay posibleng paglabag sa General Headquarters Standard Operating Procedure No. 07 tungkol sa enlistment at delisting ng AFP reservists.