Nagbitiw na bilang miyembro ng Kamara de Representantes si Ako Bicol Rep. Zaldy Co nitong Lunes, Setyembre 29, sa gitna ng kontrobersiya sa multi-bilyong pisong flood control project anomaly kung saan siya ay kabilang sa mga personalidad na isinasangkot.
“On account of the real, direct, grave and imminent threat to the lives of my family members and me, and the evident denial of my right to due process of law, I am constrained to tender with immediate effect my irrevocable resignation as a member of the House of Representatives,” sabi ni Co sa kanyang letter-resignation.
Nag-resign si Co, na dating chairman ng House Committee on Appropriations, sa kasagsagan ng imbestigasyon na isinasagawa ng Independent Commission for Infrastructure (ICI) at Senate Blue Ribbon Committee tungkol sa multi-bilyong pisong anomalya sa flood control projects kung saan siya ay kabilang sa mga personalidad na isinangkot sa kontrobersiya.
Sa kanyang liham kina House Speaker Faustino ‘Bojie’ Dy III at Ethics Committee Chairman Rep. Jonathan Clement Abalos, sinabi ni Co na ipaaalam niya sa kanilang tanggapan kung sino ang kanyang nominado bilang kapalit sa binakante niyang puwesto sa Mababang Kapulungan.
Aniya, gagamitin niyang oportunidad ang kanyang pagbibitiw sa puwesto upang sagutin ang mga reklamo na inihain ni Navotas Rep. Toby Tiangco sa House Ethics Committee noong Setyembre 22 na may kaugnayan sa flood control scam.