Muling kinasuhan ng indirect bribery si Sen. Jinggoy Estrada kaugnay sa maanomalyang flood control projects, matapos siyang ideklarang guilty sa dalawang counts ng indirect bribery noong nakaraang taon.
Sinabi ni Department of Justice (DOJ) Secretary Jesus Crispin ‘Boying’ Remulla na naghain na ng reklamong indirect bribery ang National Bureau of Investigation (NBI) sa DOJ Prosecutors Office laban kina Senators Estrada at Joel Villanueva, at tatlong iba pang personalidad na idinawit sa multi-bilyong pisong anomalya sa flood control projects.
“We determined that the NBI will be investigating it. And in the outset, they recommended the filing of charges already,” saad ni Remulla sa pagdinig ng Senate Blue Ribbon Committee noong Martes, Setyembre 23.
Samantala, matatandaan na dati nang nakasuhan ng isang count ng direct bribery at dalawang count ng indirect bribery si Estrada kaugnay sa kaso ng pork barrel scam na kinasangkutan din ng negosyanteng si Janet Lim-Napoles.
Nahatulan ang senador ng walo hanggang siyam na taong pagkakakulong para sa direct bribery at dalawa hanggang tatlong taon para sa indirect bribery noong Enero 2024.
Subalit, noong Agosto 2024 ay naabsuwelto si Estrada sa naturang kaso matapos siyang maghain ng motion for reconsideration kung saan iginiit niya na “the prosecution failed to establish his guilt beyond reasonable doubt for the lesser offenses.”
Ulat ni Ansherina Baes