Sa pagpapatuloy ng pagdinig ng Senate Blue Ribbon Committee noong Martes, Setyembre 23, sinabi ni Department of Justice (DOJ) Secretary Jesus Crispin Remulla na naghain na ng reklamong indirect bribery at malversation of public funds ang National Bureau of Investigation (NBI) sa DOJ Prosecutors Office laban kina Senators Jinggoy Estrada at Joel Villanueva, at tatlong iba pang personalidad na idinawit sa multi-bilyong pisong anomalya sa flood control projects.
“We determined that the NBI will be investigating it. And in the outset, they recommended the filing of charges already,” pahayag ni Remulla.
Ito ay matapos sumaglit si Remulla, kasama si dating Department of Public Works and Highways (DPWH) Bulacan district engineer Henry Alcantara, sa DOJ upang isalang sa evaluation ang huli kaugnay sa kanyang hiling na maipasok sa Witness Protection Program (WPP) ng pamahalaan.
“At the same time, we contacted the AMLC (Anti-Money Laundering Council), and we gave them a digital file of this (documents and pieces of evidence) and they started acting on this,” ani Remulla.
Agad ding naglabas ng freeze order ang AMLC sa ari-arian nina Senators Estrada at Villanueva, at kanilang kapwa akusado, ayon pa sa DOJ chief.
“Given that, the freeze orders have been issued by the AMLC,” giit niya.