Ipinadala na sa Senado at Kamara de Representantes nitong Lunes, Hunyo 23, ang kopya ng Answer Ad Cautelam ni Vice President Sara Duterte matapos ang 10 araw na ibinigay para sa huli upang sagutin ang mga Articles of Impeachment laban sa kanya.
“There are no statements of ultimate facts in the (impeachment complaint). Stripped of its ‘factual’ and legal conclusions, it is nothing more than a scrap of paper,” tugon ni Vice President Sara Duterte hinggil sa ika-apat na impeachment complaint na inihain laban sa kanya.
Nakasaad sa naturang dokumento na nararapat lamang na maibasura ang ika-apat na impeachment complaint (void ab initio) laban sa kanya dahil sa umano’y paglabag nito sa “one-year bar rule” ng Saligang Batas kung saan ipinagbabawal ang “initiation of more than one (1) impeachment proceeding against the same official within a period of one (1) year.”
Iginiit din ng kampo ni VP Sara na wala umanong nakitang “statements of ultimate facts” sa impeachment complaint kung kaya’t walang kailangang sagutin ang bise presidente sa Articles of Impeachment.
Kinuwestiyon din sa Answer Ad Cautelam ni VP Sara ang pag-isyu ng writ of summons para sa huli matapos ang nangyaring pagbabalik ng Articles of Impeachment sa Kamara.
“The Vice President cannot be compelled to answer allegations in Articles of Impeachment that had been ordered returned to its source,” nakasaad sa dokumento.
Samantala, kinumpirma ni House prosecution member at Batangas 2nd District Rep. Gerville Luistro na natanggap na ng prosecution panel ang tugon ni VP Sara sa Articles of Impeachment nitong Lunes.
“Certainly, we will be filing a Reply within 5 days from receipt as provided in the Rules,” aniya.
Ulat ni Jilliane Libunao