Naghain na sa International Criminal Court (ICC) Pre-Trial Chamber I ang defense team ni dating Pangulong Rodrigo Duterte ng “urgent interim release” nitong Huwebes, Hunyo 12, para kay Digong kung saan pansamantalang palalayain ang huli sa isang bansang hindi nila pinangalanan at minarkahan sa dokumento bilang “[REDACTED].”
“Mr Duterte is not a flight risk, and custody is not necessary to ensure his appearance before the Court,” saad sa inihain na ‘urgent request’ ng defense team ni dating Pangulong Rodrigo Duterte sa ICC Pre-Trial Chamber I.
Nakasaad sa dokumento na tinanggap na umano ng bansang tutuluyan ni dating Pangulong Duterte ang pagtungo niya roon kung sakaling pumayag ang ICC sa hiling na interim release.
“The Government of [REDACTED] has expressed to the Defence its advance and principled agreement to receive Mr Duterte onto its territory for the term of his interim release,” mababasa sa dokumento.
Nakalagay rin na kikilos si Duterte na naaayon sa “domestic law” ng bansang pupuntahan niya at sa mga kondisyon na ilalaan ng Pre-Trial Chamber I na nakikita nilang “appropriate.”
“There is more than good reason to believe that Mr Duterte would not embarrass his hosts, and the hospitality afforded him, by violating the terms of his release,” saad pa sa naturang dokumento.
Ulat ni Jilliane Libunao