Isang mainit na isyu ang pinalutang ni Vera Files columnist Antonio J. Montalvan II matapos lumabas ang isang video clip mula sa plenary session ng Senado noong Hunyo 10, 2025, kung saan makikita umanong “nagko-coach” si Sen. Joel Villanueva kay Sen. Imee Marcos para matigil ang manifestation ni Sen. Risa Hontiveros.
“It appears now that what happened that night was not a session after all but a pre-planned sabotage concocted by a cabal of conspirators with no regard for constitutional standards,” saad ni Montalvan.
Sa nasabing video, na kuha mula sa visitor’s gallery sa Senado, nakita umano si Villanueva na hinihikayat si Marcos na magsabi ng “Point of order” para pigilan ang manifestation ni Hontiveros, habang nagbibigay rin ng senyas si Sen. Ronald “Bato” Dela Rosa kay Sen. Imee na ituloy ang kanyang pagsingit.
Ang kilos na ito ng mga naturang senador ay tinawag ni Montalvan na “pre-planned sabotage” upang manipulahin ang proseso ng Senado sa impeachment trial laban kay Vice President Sara Duterte.
Mariin ding kinuwestiyon ni Montalvan ang legalidad ng aksyon na ginawa ng Senado noong plenary session na para sa kanya ay pagtatangka na agad ibasura ang impeachment case na aniya’y labag sa itinakdang proseso ng 1987 Constitution.
“The short clip reveals the secret. There was a cabal of conspirators who planned that night’s sinister moves as though they were not senator-judges. Far from it, in fact, for the plan involved dismissing the case – something not part of what the 1987 Constitution prescribes the Senate to do,” dagdag pa ng kolumnista.
Ulat ni Bea Tanierla