Ilang araw bago magsimula ang impeachment trial laban kay Vice President Sara Duterte, ibinunyag ni Deputy Majority Leader at La Union 1st District Rep. Paolo Ortega V noong Huwebes, Mayo 29, na bukod sa ‘Mary Grace Piattos,’ ‘Team Grocery,’ at iba pa, damay rin umano ang mga pangalan ng ilang mga Senador.
“Hanggang Senado po, hindi na pinalampas nitong ‘Budol Gang.’ Pambihira dinadamay pati mga apelyido ng ating esteemed senators. Ganiyan po kagarapal ang listahan ng supposed beneficiaries ng OVP confidential funds,” saad ni La Union 1st District Rep. Paolo Ortega V.
Aniya, ang mga pangalan ng Senador na lumitaw sa acknowledgement receipts ng confidential funds ni VP Sara ay sina “Beth Revilla,” “Janice Marie Revilla,” “Diane Maple Lapid,” “John A. Lapid Jr.,” “Clarisse Hontiveros,” “Kristine Applegate Estrada,” at “Denise Tanya Escudero.”
“Tapos may ‘Solon’ pa na ka-apelyido ng ating kasamahan na si congressman Steve Solon,” saad ni Ortega.
Katulad ng mga naunang pangalan ay wala rin umanong anumang records sa Philippine Statistics Authority (PSA) ang mga naturang pangalan.
Ulat ni Ansherina Baes