Inaprubahan na ni Pangulong Ferdinand R. Marcos Jr. ang pagtataas ng subsistence allowance para sa mga officers at enlisted personnel ng Armed Forces of the Philippines (AFP) sa P350 mula sa P150 upang makatulong sa gastusin ng kani-kanilang pamilya.
“It has been observed that the current Subsistence Allowance of AFP Personnel is no longer adequate to meet the daily sustenance of an active-duty soldier, which is essential for their well-being and performance of their duties,” sabi ni Marcos.
Nilagdaan nitong Biyernes, Marso 14, ni Executive Secretary Lucas Bersamin ang Executive Order No. 84 na nagtataas ng subsistence allowance hindi lamang para sa mga tauhan ng AFP ngunit maging ang mga trainees, probationary lieutenants/ensigns, Citizens Military Training (CMT) cadets, reserved officers at enlisted reservists, at iba pa.
Pinaboran ni Pangulong Marcos ang pagtataas ng subsistence allowance dahil ang pinakahuling adjustment ay noon pang 2015 sa ilalim ng Congress Joint Resolution No. 5 at dahil hindi na sapat ang P150.