Naglabas na ang Office of the Ombudsman ngayong Huwebes, Abril 16, ng show cause order na nag-oolbiga kay Assistant Special Prosecutor Atty. Ryan Quilala na magsumite ng kanyang affidavit tungkol sa alegasyon ni Ramil Madriaga.
“You are hereby reminded that any proof of your participation in the alleged illegal activities with Mr. Madriaga may subject you to administrative and criminal prosecution,” nakasaad sa show cause order ng Office of the Ombudsman.
Ito ay matapos akusahan ni Madriaga, ang nagpakilalang political adviser at operator nina Vice President Sara Duterte at kanyang ama na si dating Pangulong Rodrigo Roa Duterte, na nag-deliver siya ng P15 million cash kay Quilala sa utos ng mga Duterte.
Ang alegasyon ni Madriaga ay nakasaad sa kanyang supplemental affidavit na isinumite sa House Committee on Justice sa isinagawang impeachment hearing sa mga kontrobersiya na kinahaharap ni VP Sara noong Martes, Abril 14.